Là, là j'oiray d'Alcée
La lyre courroucée,
Et Sapphon qui sur tous
Sonne plus dous.

                                          … le doux Anacréon
Me plaist, et je voudrois que la douce Sapphon,
Qui si bien resvoillait la lyre Lesbienne,
En France accompagnast la Muse Teïenne ! ...

Ronsard Le second Livre des Poèmes t. II, p. 803

De Sapphon
Δἐδυκε μὲν ἁ σελάνα

Desja la Lune est couchée,
La poussinière (1) est cachée,
Et ja la my-nuit brunette
Vers l’Aurore s’est panchée,
Et je dors au lit seulette. (2)

Ronsard (1560) La Pléiade Gayetez t. I, p. 547

CHANSON

 

Je suis un demy-dieu, quand, assis vis-à-vis
De Toy, mon cher souci, j'escoute des devis,
Devis entre-rompus d'un gracieux sourire,
Souris qui me retient le cœur emprisonné :
Car, en voyant tes yeux, je me pasme étonné
Et de mes pauvres flancs un seul vent je ne tire.
Ma langue s'engourdit, un petit feu me court
Frétillant sous la peau : je suis muet et sourd
Et une obscure nuit dessus mes yeux demeure ;
Mon sang devient glacé, l'esprit fuit mon corps,
Je tremble tout de crainte, et peu s'en faut alors
Qu'à tes pieds estendu sans âme je ne meure.

Pierre de Ronsard Le Second Livre des Amours La Pléiade t. I p. 228

 

CHANSON

Quand je te veux raconter mes douleurs,
Et de quel mal en te servant je meurs,
Et quelle fibvre ard toute ma mouelle,
Ma voix tremblote, et ma langue chancelle,
Mon cœur se pasme, et le sang me tre-saut :
En mesme instant j’endure froid et chaut,
Sur mes genoux descend une gelee,
Jusqu’aux talons une sueur salee
De tout mon corps comme un fleuve se suit,
Et sur mes yeux nage une obscure nuit :
Tant seulement mes larmes abondantes,
Sont les tesmoings de mes flames ardantes,
De mes soupirs et de mon long soucy,
Qui sans parler te demandent mercy.

Pierre de Ronsard Le Second Livre des Amours t. I p. 218 éd. La Pléiade

ELEGIE

Pour vous montrer que j'ay parfaite envie
De vous servir tous le temps de ma vie,
Je vous suppli' vouloir prendre de moy
Ce seul présent, le tesmoin de ma foy,
Vous le donnant d'affection extrême
Aveq' mon cœur, ma peinture et moy mesme.
Or ce présent que je vous donne icy
Est d'un metal qui reluist tout ainsi
Que fait ma foy, qui purement s'enflame
De la clarté de votre sainte flame,
Et tellement vit en vostre amitié
Qu'autre que vous n'y a part ny moitié.
L'or est gravé, et l'amour qui m'imprime
Vostre vertu que tout le monde estime,
M'a si au vif engravé de son trait
Et vostre grace et vostre beau portrait,
Que je ne vy, sans voir en toute place
Vostre presence au devant de ma face,
Car plus vos yeux sont eslongnez de moy
Et de plus pres en esprit je les voy.
Sur les deux bords sont engravez deux Temples,
(Des amitiez les fideles exemples)
Par la peinture il faut representer
Ce qui nous peut toutes deux contenter.
Le Temple donq d'Apollon represente
Le beau Chorebe , et l'ardeur violente
Dont pour Cassandre Amour tant le ferut
Que pour sa Dame à la fin il mourut.
O belle mort ! avienne que je meure
Vostre, pourveu que vostre je demeure :
Heureuse lors je pourrois m'estimer
Quand je mourrois ainsi pour vous aimer :
Car l'amitié que je vous porte est telle
Qu'elle sera après mort immortelle :
Aussi le temps, ny l'absence des lieux,
Tempeste, guerre, ou l'effort d'envieux,
N'effaceront, tant leur rigueur soit forte,
Nostre amitié qui sainctement je porte .
Pource j'ai mis autour du Temple aussi
Ce vers Latin qui s'interprete ainsi,
Vostre amitie chaste avecque la mienne
Surmontera toute amour ancienne.
Dans l'autre Temple, à Diane voué,
(Où la Scythie a tant de fois loué
L'amour de deux qui rarement s'assemble)
Se voit Oreste et son Pylade ensemble,
Deux compagnons si fermement amis,
Que l'un cent fois comme prodigue a mis
Son sang pour l'autre, ayans tous deux envie
De consacrer l'un pour l'autre la vie :
Cœurs genereux, et dignes de renom,
Qui pour aimer ont celebré leur nom.
Telle amitié bien qu'elle fust parfaite
Est aujourd'huy par la mienne desfaite,
Car je la passe autant que je voudrois
Mourir pour vous cent et cent mille fois :
Pource j'ay pris un vers Latin qui montre
Qu'amour pareille icy ne se rencontre,
Et que ces deux le lieu doivent quitter
A notre foy qui les peut surmonter.
Dessous le Temple est l'autel où la Grece,
(Ains que tuer la Troyenne jeunesse)
Jura dessus, que point ne se lairroit,
Mais au combat l'un pour l'autre mourroit.
Sur cet autel, Maistresse, je vous jure
De vous servir, et si je suis parjure,
Le Ciel vangeur de l'incertaine foy
Puisse ruer la foudre desur moy :
Le vers Romain donne assez à cognoistre
Qu'en vostre endroit fidele je veux estre,
Et que mon sang je voudrois sur l'autel
Verser pour vous par service immortel.
Dedans la pomme est peinte ma figure
Palle, muette et triste, qui endure
Trop grièvement l'absence de nous deux
Ne jouyssant du seul bien que je veux.
Hà ! je voudrois que celuy qui l'a faite
Pour mon secours ne l'eust point fait muette,
Elle pourroit vous conter à loisir
Seule à par-vous, l'extreme desplaisir
Que je recoy, me voyant séparée
De vous mon tout, demeurant esgarée
De tant de bien qui me souloit venir,
Ne vivant plus que du seul souvenir
Et du beau nom que vous portez, Madame,
Qui si avant m'est escrit dedans l'ame.
Mais quel besoin est-il de presenter
Un portrait mort qui ne peut contenter,
Quand de mon corps vous estes la Maistresse,
Et de l'esprit qui jamais ne vous laisse ?
Las ! c'est afin qu'en le voyant ainsi,
A tout le moins ayez quelque souci
De moy qui suis en douleur languissante
Pour ne voir point vostre face presente,
Plus grand plaisir je ne pourrois avoir
Que vous servir en presence, et vous voir.
Puis tellement dedans vous je veux estre
Qu'autre que vous je ne veux recognoistre :
Le vers Romain mis autour du portrait
Declare assez mon desir si parfait,
C'est qu'Anne vit en sa Diane esprise,
Diane en Anne, et que le temps, qui brise
Empire et Rois et qui tout fait plier,
Deux si beaux noms ne sçauroit deslier.
Le plus grand bien que Dieu çà bas nous face,
C'est l'amitié qui toute chose efface.
Sans amitié la personne mourroit,
Et vivre saine au monde ne pourroit.
C'est doncq le bien qu'au monde il nous faut suivre,
Le sang, le cœur ne font les hommes vivre
Tant comme fait la fidele amitié
Quand on retrouve une fois sa moitié.
Telle, Maistresse, en m'ayant esprouvée,
M'avez certaine en vostre amour trouvée,
Car vous et moy ne sommes sinon qu'un,
Et si n'avons qu'un mesme corps commun :
Vostre penser est le mien, et ma vie
Est de la vostre entierement suivie.
Ce n'est qu'un sang, qu'une ame et qu'une foy,
Je suis en vous, et vous estes en moy
D'un noeud si fort estroitement liée,
Que je ne puis de vous estre oubliée
Sans oublier vous mesmes, et ainsi
Je n'ay ni peur ny crainte ny souci,
Tant toute en vous je me trouve, Madame,
Et mon ame est tout entiere en vostre ame.
Ce bien me vient, pour point n'en abuser,
De la faveur dont il vous plaist m'user,
Me cognoissant de beaucoup estre moindre :
Mais vous daignez vostre hautesse joindre
A moy plus basse, afin que tel honneur
Me rende égale à vous par le bon-heur :
C'est la raison pourquoy je vous dedie
Mon sang, mon cœur, ma peinture, et ma vie.

Pierre de Ronsard

(in Les Elégies 1565 - pièce retranchée en 1584, La Pléiade t. II p. 421)

Sonnet

Anne m'a fait de sa belle figure
Un beau present que je garde bien cher,
Cher pour autant qu'on n'en sçauroit cercher
Un qui passast si belle portraiture.

Diane icy redonne sa peinture
A sa maistresse Anne, pour revancher
Non le present, mais toujours pour tascher
Que son service envers son ame dure .

Des deux costés le portrait est gravé
De meint exemple entre amis éprouvé
De Corebus, de Pylade, et d'Oreste,

Et d'un autel sacré à l'Amitié,
Pour tesmoigner qu'un amour si celeste
N'a fait qu'un coeur d'une double moytié.

Pierre de Ronsard

(in Les Elégies 1565 à la suite de l'élégie prédédente,

pièce retranchée en 1584 et éditée in Sonnets à diverses personnes, La Pléiade t. I p. 514)

ELEGIE ATTRIBUEE A RONSARD

Ainsi qu'on voict la vefve tourterelle
Aux plus beaux mois de la saison nouvelle,
De bois en bois, de buisson en buisson,
Tenir seullette une triste chanson,
Et tellement le soucy l'accompaigne
Pour le regret de sa chere Compaigne,
Que du Printemps les amoureux presens
Ne luy sont plus gratieux ny plaisans,
Herbes, ruisseaux, fleurettes ny verdure,
Mais lamentant d'ung enroué murmure
Remplist les boys et les champs d'alentour,
Se complaignant de fortune et d'amour :
Au poinct du jour quand le soleil s'esveille
Et quand la nuit soubz les eaux il sommeille,
Et à midy quand l'extreme chaleur
Faict perdre aux fleurs et puissance et coulleur,
Sur l'arbre sec en tout temps, à toute heure,
Sans reconfort sa compaigne elle pleure
Qu'ung oyseleur en la prime saison
A prise aux retz pour la mettre en prison,
Et la tient serve en l'obscur d'une cage
Loing de ruisseaux, de fleurs et de bocage.
Plus nous n'irons, ce dict ce triste oyseau,
Comme soulions au temps du renouveau,
Nous promener par la verte prairie,
Ny sur les bords d'une rive fleurie,
Ny par les boys de feuilles herissez,
Par les ruisseaux de mousse tapissez
Où le gravois cacquetant se promeine
Roullé des flotz d'une claire fontaine.
Tout me desplaist. Le verd ne m'est plus verd,
De noir obscur le Printemps s'est couvert.
Toutes les fleurs de doulleurs sont atteinctes
Et les ruisseaux s'accordent à mes plaintes.
Depuis le jour que tu partys d'icy
Tout s'est changé en larmes et soucy
Tout s'est noircy d'une doulleur extresme
Et rien ne vit sinon la doulleur mesme.
Le jour m'est nuict, la muict me semble jour,
Et par les boys ne regne plus Amour.
Helas je meurs. Je debvois estre prise
Le mesme jour que perdiz ta franchise ,
Car aussi bien je ne viz plus en moy :
Ou si j'estois prisonniere avec toy,
A tout le moins prisonnieres ensemble
Tous deux vivrions. Et le dueil qui me semble
Plus dur que mort loing de mon amitié
Seroit plus doux porté par la moictié.
Ainsi se plaint d'une longue querelle
Par les forests la vefve Tourterelle,
Et je vous plains de perdre promptement
Celle qui est vostre contentement,
Ains vostre tout. Car par amour commune
N'avez qu'un coeur et n'avez ame qu'une.
Ainsi vivant toutes deux en commun
Par le penser voz deux corps ne sont qu'un
Et le penser tellement vous compose
Que voz deux corps n'est qu'une mesme chose.
Le triste jour qu'il fauldra desloger,
Le Ciel vouldra sa lumiere changer
Pour ne veoir poinct vos larmes amoureuses
Et pour n'oyr vos plainctes douloureuzes.
Vous feriez fendre ung rocher endurcy,
Disant l'adieu que vous direz ainsi :
Chere Compaigne, ainçois ma chere vye,
Mon sang, mon coeur, quelle cruelle envye
En m'esloignant me separe de vous
Et du lien qui nous estoit si doulx,
Ne plus ne moins que si quelques tenailles
En me forçant me tiroient les antrailles,
Foye, poulmons, sang, arteres et coeur,
Et me laissoient tout le corps sans vigueur.
Je ne vy plus, je ne suis qu'une mace,
Mace de plomb, la charge d'une place,
Sans rien sentir, car mon seul mouvement
S'est refroidy par ce departement.
Adieu, pensers, adieu, doulces parolles,
Adieu, discours. Helas, Amour, tu volles
Plustost que moy : tu t'en vays, et ne puis
Suivre ton vol tant debile je suis.
Las, arrestée en paines si cruelles
J'ay par le hault pour m'envoler des aesles
Et par le bas du plomb qui me retient.
Le souvenir seullement me soubtient.
En quelque part que tu ailles, amie,
Tu ne m'as pas doubteuse ny demie,
Mais toute entiere, et si pourray passer
Si longs chemins par le bien du penser,
Et le vaincueur qui vous tire par force
N'aura sans plus que le corps et l'escorce,
La bouche froide et le bien froid baiser,
Charbon sans feu : car l'amoureux braiser,
Jeux et plaisir, parolles et delices
Feront tousjours entre nous leurs offices
Par le penser. Et le penser vault mieux
Qu'ung corps pesant de soy mesme otieux.
Ainsi les Dieux qui n'ont que les pensées
Ne peuvent veoir leurs joyes offencées.
Le corps n'est rien qu'un fardeau sommeilleux,
L'esprit est vif, actif et généreux.
En vous perdant je n'ay plus de puissance,
En vous je suis : vous etes mon essence,
Je viz en vous, je ne viz plus en moy.
Vous estes tout mon bien et mon esmoy,
Et nostre ame est en noz corps si enclose
Si que deux corps n'est qu'une mesme chose.
Toutes les nuicts quand le soleil couchant
Ira le jour soubs les ombres cachant,
Vostre gentille et gratieuse image
Viendra de nuict resjouyr mon courage,
Et en despit des ombres et du vent
Et du facheux, je vous tiendray souvent
Entre mes bras, prenant quelque alegeance
De vostre vaine amoureuse semblance .
Et si le vray ne se peult presenter
Au moins le faux me pourra contenter.
Or adieu donc. La gresle et la tempeste
Fouldres, esclairs puissent suivre la teste
De ce fascheux qui vous tire si loing,
Rochers, cailloux, les brigands et le soing
Soient à ses pieds, et toute chose dure,
Pour me venger du tourment que j'endure,
Affin, mon Coeur, que puissiez revenir
Et que le corps perde le souvenir.
Ainsi direz. Lors vous voyant pleureuse,
Dolente, triste, espamée, amoureuse,
Et voz beaux yeux larmoyants à l'escart,
J'auray pitié non pas pour ce départ
Ny pour l'adieu qui vous ravira l'ame,
Mais pour vous voir en tristesse, madame,
Seulle, pensive et ne pensant plus rien
Que de songer au bien qui n'est pas bien
Et qui s'enfuit vers les Alpes chenues
Ainsi qu'au vent le long troupeau des nues.
Je vouldrois bien d'ung traict delicieux
Boire ung petit des larmes de vos yeux,
Qui descendront par vostre belle face,
Et respirant en mon coeur faire place
A voz souspirs parmy l'air espanduz.
Quand ils seroient devant moy descenduz,
A tout le moins maugré vous convertie
J'aurois de vous quelque doulce partie
Et telle part à la fin tant vauldroit
Que tout l'entier par le temps y viendroit.
Pour achever, affin que je me plaigne,
Perdant, madame, une chere compaigne,
Vous acquerrez s'il vous plaist ung servant
Qui sera vostre, et qui en poursuivant
Vostre amitié par une amour non feincte,
Allegera vostre triste complainte.

Ronsard La Pléiade t. II, p. 1232 à 1235